Skýrsla stjórnar U3A Reykjavík, starfsárið 2022 – 2023
Lögð fram á aðalfundi samtakanna 21. mars 2023.
Svipmyndir frá aðalfundinum
Skýrsla stjórnar U3A Reykjavík
starfsárið 2022 – 2023
Lögð fram á aðalfundi samtakanna 21. mars 2023
Stjórn U3A Reykjavík starfsárið 2022-2023.
Frá vinstri: Borgþór Arngrímsson, Emma Eyþórsdóttir, Guðrún Bjarnadóttir, Guðríður Þorsteinsdóttir, Hans Kristján Guðmundsson, Birna Sigurjónsdóttir og Þórleif Drífa Jónsdóttir
Stjórn og stjórnarstarf
Á aðalfundi 22. mars 2022 var Birna Sigurjónsdóttir endurkjörin formaður til eins árs. Borgþór Arngrímsson, Emma Eyþórsdóttir, Guðrún Bjarnadóttir og Hans Kristján Guðmundsson voru á síðara ári tveggja ára umboðs til stjórnarsetu. Birna G. Bjarnadóttir og Jón Ragnar Höskuldsson gengu úr stjórn og Guðríður Þorsteinsdóttir og Þórleif Drífa Jónsdóttir voru kjörnar til tveggja ára stjórnarsetu.
Stjórn skipti með sér hlutverkum og starfsárið 2022 til 2023 var Þórleif Drífa Jónsdóttir varaformaður, Emma Eyþórsdóttir ritari, Guðrún Bjarnadóttir gjaldkeri, Borgþór Arngrímsson, Guðríður Þorsteinsdóttir og Hans Kristján Guðmundsson meðstjórnendur. Stjórnin hefur unnið samkvæmt starfslýsingu í 8. gr. í samþykkt samtakanna og er stjórnarstarfið unnið í sjálfboðavinnu.
Stjórnin hélt 12 fundi á starfsárinu þar af einn sameiginlegan með stjórn Vöruhúss tækifæranna. Verkaskipting var staðfest á fyrsta stjórnarfundi eftir aðalfund. Á stjórnarfundum var almennt fjallað um starfsemi samtakanna og hvernig megi efla þau, dagskrá og skipulag viðburða, miðlun og upplýsingagjöf til félaga, viðhald heimasíðu, fjárhag, kynningar og samstarf við aðila innanlands sem erlendis.
Sú breyting varð á að U3A Reykjavík sagði upp aðild að Reykjavíkurakademíunni í desember 2022 en félagið hafði leigt skrifstofuaðstöðu og aðgang að fundaraðstöðu akademíunnar í Þórunnartúni 2 frá haustdögum 2018. Á sama tíma gerðist félagið aðili að samtökum um Almannaheill. Um er að ræða samtök almannaheillafélaga og sjálfseignastofnana sem ætlað er að vinna að heill ótiltekins fjölda einstaklinga án hagnaðarsjónarmiða. Almannaheill hafa fundaraðstöðu í Urriðaholtsstræti 14 í Garðabæ og fær U3A Reykjavík afnot af aðstöðunni fyrir stjórnarfundi og smærri námskeið á vegum stjórnar og hópa innan félagsins.
Fjármál
Fjárhagsár samtakanna er almanaksárið. Ársreikningur almanaksársins 2022 verður lagður fram til samþykktar á aðalfundi 21. mars 2023 og fylgir hann hér í viðauka. Samkvæmt efnahagsreikningi er eigið fé í lok árs 2022 kr. 1.030.494 og rekstrarafkoma ársins kr. -576.574 Tekjur voru samtals kr. 2.417.625, þar af eru félagsgjöld 1.754.000. Útgjöld U3A Reykjavík á tímabilinu voru samtals kr. 2.994.199. Skoðunarmenn reikninga eru Lilja Ólafsdóttir og Gylfi Þór Einarsson og Þórleifur Jónsson til vara. Ársreikningar Vöruhúss tækifæranna verða einnig kynntir og lagðir fram til samþykktar á aðalfundi.
