Fræðslufundir og námskeið
Kjarni starfsemi U3A Reykjavík eru vikulegir fræðslufundir á þriðjudögum kl. 16:30 – 18:00 í Hæðargarði 31. Fræðimenn á ýmsum sviðum hafa verið fengnir til að fjalla um fjölbreytt efni, s.s. útivist, ný næringarviðmið, viðbrögð við neyðarástandi og stöðu í alþjóðamálum, svo eitthvað sé nefnt af því sem var á dagskrá síðasta starfsárs.
Sjá má yfirlit yfir erindi og aðra viðburði liðinna ára hér
Á fyrsta félagsfundi að hausti er leitað eftir hugmyndum félagsmanna að umfjöllunarefni og stjórnin vinnur síðan úr þeim hugmyndum sem þar koma fram.
Haustið 2020 var farið að streyma fyrirlestrum og taka þá upp. Þeir eru nú aðgengilegir félagsmönnum í mánuð á eftir flutning. Þetta hefur mælst vel fyrir og mun fleiri sem njóta fræðslunnar nú en áður. Að meðaltali hafa hátt á þriðja hundrað félagsmenn fylgst með hverjum fyrirlestri á síðasta ári og hæst hefur áhorfið farið í vel á þriðja hudrað. Þá eru taldir þeir sem mæta í salinn, þeir sem fylgjast með í streymi og þeir sem nýta upptökuna en félagsmenn fá senda slóð á hana og geta þá horft þegar þeim hentar.
Auk fræðslufunda er reglulega efnt til námskeiða um ýmis efni.
Ef þú vilt koma hugmynd að umfjöllunarefni/fyrirlesara á framfæri þá getur þú sent tölvupóst merktan hugmyndir á netfangið: u3areykjavik@gmail.com
