Tsjernóbyl bænin

Þriðjudaginn 19. apríl kl. 16:30 kynnir Gunnar Þorri Pétursson, þýðandi bókina Tsjernóbyl bænin eftir Svetlana Aleksíevítsj. Gunnar fékk íslensku þýðingarverðlaunin 2022 fyrir þýðinguna.

Um bókina segir á heimasíðu Forlagsins: Þann 26. apríl 1986 urðu sprengingar í kjarnakljúfi í Tsjernobyl í Úkraínu sem ollu stærsta kjarnorkuslysi allra tíma. Himinninn logaði og geislunin náði yfir stórt landsvæði. Slysið hafði hörmuleg áhrif á líf hundruði þúsunda mann til frambúðar. Ráðamenn reyndu að þagga það niður. Þetta er vitnisburður þeirra sem eftir lifðu. Tsjernobyl-bænin byggir á hundruðum viðtala hvítrússneska rithöfundarins og blaðamannsins Svetlönu Aleksíevítsj við fólk sem lifði kjarnorkuslysið af. Hún hlaut Nóbelsverðlaunin í bókmenntum árið 2015 ,,fyrir margradda skrif, minnisvarða um þjáningar og hugrekki á okkar tímum“, og hafa bækur hennar verið þýddar á 53 tungumál. Tsjernobyl-þættirnir vinsælu eru að hluta til byggðir á þessari bók.

Gunnar Þorri Pétursson er þýðandi og sjálfstætt starfandi fræðimaður.