Hvernig mataræði stuðlar að góðri heilsu?

Þriðjudaginn 6. maí kl. 16:30 kemur Jóhanna Eyrún Torfadóttir til okkar í Hæðargarð 31 með erindi sem hún nefnir: Hvernig mataræði stuðlar að góðri heilsu?

Það er misjafnt milli einstaklinga hversu mikið við spáum í mataræðið okkar og flest okkar höfum komið okkur upp venjum á fullorðinsárum sem erfitt getur reynst að breyta.

Í fyrirlestrinum fer Jóhanna E. Torfadóttir yfir ný viðmið um orku- og næringarefni sem og nýjar fæðutengdar ráðleggingar frá embætti landlæknis. Sérstök áhersla verður lögð á breyttar þarfir eftir því sem við eldumst og hvernig hægt er að gera litlar en jákvæðar breytingar fyrir heilsuna.

Jóhanna útskrifaðist með meistaragráðu í næringarfræði frá Háskóla Íslands árið 2002, eftir að hafa tekið meirihluta skylduáfanga sem gestastúdent við hinn konunglega Landbúnaðarháskóla í Kaupmannahöfn. Eftir að hafa starfað á Matvælasviði Umhverfisstofnunar og sem ráðgjafi fyrir skólamötuneyti Reykjavíkurborgar hóf hún doktorsnám við Miðstöð í lýðheilsuvísindum hjá Læknadeild HÍ haustið 2007. Fjallaði verkefni hennar um næringu á mismunandi æviskeiðum og tengsl við krabbamein í blöðruhálskirtli. Gögnin fyrir verkefnið voru fengin frá Hjartavernd og hefur Jóhanna unnið að fjölda rannsókna tengt fleiri tegundum krabbameina í samstarfi við Hjartavernd.

Eftir að hafa unnið að nýdoktoraverkefni um D-vítamínbúskap og lifun með krabbamein starfaði Jóhanna hjá Krabbameinsfélaginu um nokkra ára skeið en starfar nú í hlutastarfi hjá embætti landlæknis og sem lektor

við Miðstöð í lýðheilsuvísindum. Hún á þrjú börn, eitt barnabarn og hund og því líflegt og skemmtilegt bæði á vinnutíma sem og utan vinnunnar.