Hamingja þessa heims

Þriðjudaginn 14. mars kl. 16.30 kemur Sigríður Hagalín í Hæðargarð 31, hún ætlar að lesa upp úr nýjustu bók sinni Hamingja þessa heims og segja frá tilurð hennar.

Fimmtánda öldin er öldin sem týndist í Íslandssögunni, og fátt hefur varðveist um hana annað en nokkur feyskin skjöl og munnmælasögur. Sigríður Hagalín Björnsdóttir rifjar hana upp í skáldsögunni Hamingja þessa heims, sem kom út í nóvember sl. Persónur eins og Ólöf ríka Loftsdóttir, Björn Jórsalafari Einarsson, Loftur riddari Guttormsson og hinn leyndardómsfulli Skáld-Sveinn stíga ljóslifandi fram úr blámóðu tímans, og sagnfræðingurinn Eyjólfur Úlfsson situr í útlegð í Dölunum eftir ágjafir #metoo-byltingarinnar og reynir að átta sig á samtíma sínum – og okkar – um leið og hann leiðir lesandann í gegnum sögu 15. aldarinnar.

Sigríður Hagalín Björnsdóttir stundaði nám í sagnfræði og spænskum bókmenntum við Háskóla Íslands og einnig við háskólann í Salamanca á Spáni. Frá árinu 1999 hefur Sigriður starfað, með hléum, hjá Ríkisútvarpinu. Sem fréttamaður og fréttaþulur, fréttaritari í Kaupmannahöfn, haft umsjón með Kastljósi og Silfrinu auk annars. Hamingja þessa heims er fjórða bók Sigríðar, sú fyrsta Eyland kom út 2016, Hið heilaga orð 2018 og Eldarnir 2020.