Viðburðir framundan hjá U3A Reykjavík

Í desember höldum við jólafund í sal veitingahússins Nauthóls, fimmtudaginn 8. desember kl. 15-17:00. Þar koma til okkar arkitektarnir Dennis Davíð Jóhannesson og Hjördís Sigurgísladóttir og kynna bók sína Straumar frá Bretlandseyjum – Rætur íslenskrar byggingarlistar. Bókin er afrakstur sögulegs rannsóknarverkefnis Hjördísar og Dennis. Hún fjallar um hvernig áhrif frá Bretlandseyjum hafa mótað íslenska byggingarsögu frá upphafi byggðar og fram á daginn í dag. Við njótum veitinga og eigum stund til samveru og spjalls.

Á haustönninni hefur verið mjög góð þátttaka í viðburðum U3A Reykjavík. Fyrirlestrar hafa verið fjölsóttir, salurinn oftar en ekki fullsetinn á þriðjudagsfyrirlestrum og enn fleiri notið þessa að hlusta og horfa á upptökurnar sem við sendum út. Að meðaltali eru það um 200 manns sem fylgjast með fyrirlestrum og þá teljum við saman þá sem koma í salinn og þá sem eru með í streymi  eða sjá upptökuna.

Við hefjum svo starfið á nýju ári með fyrirlestri þriðjudaginn 10. janúar í Hæðargarði þar sem fjallað verður um áhrif tónlistar á fólk. Auk þriðjudagsfyrirlestra verður umhverfishópur með stutt málþing um loftslag og umhverfi 14. janúar sem er laugardagur. Heimsókn í Íslenska erfðagreiningu er á dagskrá í janúar og einnig viðburður á vegum menningarhóps. Við kynnum síðan janúardagskrána strax á nýju ári.

Megið þið njóta aðventunnar, jóla og áramóta sem best.

Stjórn U3A Reykjavík