Þegar rætt er um hin mismunandi æviskeið er bernskan og unglingsárin oft kölluð fyrsta æviskeiðið, þá tekur við annað æviskeiðið sem er þá meginhluti starfsáranna þegar fólk er komið á vinnumarkað, eignast sitt eigið heimili og kemur sér fyrir í lífinu. Þriðja æviskeiðið tekur svo við. Þá er átt við þann tíma fullorðinsáranna sem einkennist oft af viðunandi fjárhagsstöðu, góðri almennri heilsu og minni starfsábyrgð. Það felur oft í sér fjölbreyttar breytingar og tækifæri í lífi einstaklinga.

Þetta æviskeið, efri ár ævinnar í starfi og eftirlaunaaldurinn, getur varað í mörg ár og áratugi og í nútíma samfélagi á fólk margra kosta völ þegar kemur að því að leita lífsfullnægju og finna sér tilgangsrík viðfangsefni. Því er oft fagnað sem tímabili fyrir nýja möguleika, þar sem einstaklingar geta nýtt sér þá reynslu og visku sem þeir hafa áunnið sér. Margir finna tíma til að kanna ný áhugamál  eða afla sér frekari menntunar.

Fjölmennar kynslóðir eru nú að nálgast eftirlaunaaldur og eru líklegar til að breyta ásýnd hans. Lífslíkur þessara hópa eru meiri en kynslóðanna á undan, menntunarstig hærra og heilsa verður væntanlega betri en  hjá fyrri kynslóðum. Þarfir þessara hópa fyrir virkni og farsæla öldrun verða aðrar og ekki síst verður leikni til notkunar á nýrri tækni í samskiptum mun mikilvægari en áður.

Þriðja æviskeiðið á sér tiltölulega skamma sögu og er nátengt auknum lífslíkum þjóða og mannfjöldaþróun í samfélögum nútímans. Þau ár sem tengja má þessu skeiði eru breytileg frá einum einstaklingi til annars, en starfi samtakanna U3A Reykjavík er einmitt beint að þessu tímabili.